Dəfn xərcləri məscidlər tərəfindən qarşılana bilər

Ölkəmizdə dəfn pulu deyilən bir anlayış var ki, bu müavinət dünyasını dəyişən şəxslərin yaxınlarına verilir. Təəssüflər olsun ki, bu ödəniş hər kəsə şamil edilmir. Daha dəqiq desək, qanunvericilik ölülər arasında ayrı-seçkilik salır.

Sosial Müdafiə Fondundan verilən məlumata görə, işləməyən, pensiya və ya sosial müavinət, eləcə də işsizlikdən sığorta ödənişi almayan şəxs vəfat etdikdə dəfn üçün müavinət verilməsi nəzərdə tutulmur. Qanunvericiliyə görə, dəfn üçün müavinət sığorta olunan, əmək pensiyaçısı və ya sosial müavinət alan, habelə işsizlikdən sığorta ödənişi alan şəxs vəfat etdikdə təyin olunur və dəfn xərcini çəkən şəxsə ödənilir.

Qanunvericilikdəki bu ayrı-seçkilik vətəndaşlar tərəfindən narazılıqla qarşlanır. Ekspertlər isə bildirirlər ki, dəfn pulu ala bilməyən şəxslər dünyasını dəyişdikdə onların dəfn xərcləri yaşadıqları ərazidəki məscidlər tərəfindən qarşılana bilər.

Bəs görəsən, Milli Məclisin Əmək və sosial siyasət komitəsi sözegedən məsələnin həlli ilə bağlı qanunvericilikdə hansısa dəyişikliklərin edilməsini nəzərdə tuturmu?