Dövlət məktəbəqədər təhsilə vəsait ayırmayacaq? – Nazir açıqladı

“Məktəbəqədər təhsilin 100% dövlət tərəfindən maliyyələşməsi real deyil”.

Bunu elm və təhsil naziri Emin Əmrullayev Milli Məclisin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında 2026-cı il büdcə zərfinin müzakirəsi zamanı deyib.

Nazir bildirib ki, hazırda ölkədə 600 min 1-5 yaşlı uşaq var və əgər bütün uşaqların məktəbəqədər təhsilə cəlb olunması nəzərdə tutulursa, bunun üçün dövlətin illik xərci təxminən 2,7 milyard manat təşkil edir.

Onun sözlərinə görə, bu vəsaitin hər il yalnız məktəbəqədər təhsilə xərclənməsi qeyri-real görünür:

"Dünyanın heç bir yerində belə təhsil sistemi yoxdur ki, dövlət məktəbəqədər təhsilə gedən bütün uşaqların təhsil haqqını ödəsin. 100% dövlət tərəfindən maliyyələşən model tapmaq çətindir. Bu problemin həllinin fərqli alternativ tələb etdiyini nəzərə alaraq, son illər alternativ modellər tətbiq edirik".

Nazir qeyd edib ki, yeni modellər hazırlanarkən həmin uşaqların valideynlərinin sosial vəziyyəti, işləyib-işləməməsi və şəhər-kənd fərqləri nəzərə alınmalıdır.

E.Əmrullayev həmçinin icma əsaslı məktəbəqədər təhsil modelinin ənənəvi baxçadan təxminən 8 dəfə ucuz başa gəldiyini diqqətə çatdırıb:

"Bir uşağı ənənəvi məktəbəqədərə göndərmək əvəzinə, həmin vəsaitlə 8 uşağı icma əsaslı məktəbəqədərə cəlb etmək mümkündür. Bu model artıq özünü doğruldur".