Əlil cütlüyün əkizləri oldu | Dedi ki, bəlkə, birini aldıraq? - ARZUNUN VAXTI

“Arzunun vaxtı” verilişinin yeni buraxılışı yayımlanıb.

Verilişin budəfəki sayında aparıcı və müəllif Arzu Kəlbi əkiz övladları dünyaya gələn fiziki məhdudiyyətli cütlüyün evində olub.

Bəzi insanların onların evliliyinə əngəl olduğunu söyləyən Lamiyə Əmirova bildirib ki, bir araya gəlmələri çətinliklə olub.

“Mənə “üç aydan sonra ərin səni boşayacaq” deyirdilər. Babəkin mərhəmətli tərəfini sevirəm. Beş ildir ki, evliyik, bir dəfə də olsun, uşaq məsələsində tələsməyib. Əksinə, həmişə mən tələsirdim, istəyirdim ki, övladımız olsun. Amma o, “Lamiyə, səni düşünürəm, birdən nəsə olar” deyirdi. Hətta uşaqlarımızın əkiz olduğunu biləndə “Görəsən, necə olacaq, bəlkə birini aldıraq” demişdi”, – o söyləyib.

Həyat yoldaşına olan sevgisindən danışan Babək İsmayılovun sözlərinə görə, insanlar gərək sevərək ailə qursunlar:

“Sevgi ürəkdən, daxildən gəlir. Lamiyənin təmiz qəlbini sevirəm. Onu itirməkdən çox qorxuram. Yatsam, yuxuma da girməzdi ki, ata olacağam, bu xəbəri eşidəndə çox sevindim”.

Qızının adını “Arzu” qoyan Lamiyə Əmirova bunun səbəbini belə açıqlayıb:

“Arzu xanım, xətrinizi çox istəyirik, sizi çağıranda düşünmədən gəlirsiniz, bir dəfə də olsun bizə “yox” deməmisiniz. Babək sizin sayənizdə Hepatit virusundan xilas oldu, uşaqlarımızı sayənizdə həyatda saxlaya bildik. Buna görə qərara gəldik ki, adınızı qızımıza qoyaq. Bu adı həm də o niyyətlə övladıma verdim ki, istəyirəm, o, gələcəkdə sizin kimi gözəl qəlbli, mərhəmətli jurnalist olsun”.