Emin Ağalarov ona ünvanlanan fikirlərə münasibət bildirib

Emin Ağalarov kazino açmaq qərarına görə ona ünvanlanan fikirlərə münasibət bildirib.

O qeyd edib ki, kazinonun fəaliyyət göstərməsi ölkədə turizmin inkişafı, həm xaricdən üst kateqoriya turistlərin Azərbaycana gəlməsi, həm də xarici ölkələrdə bu sahədə pul xərcləyən yerli turistlərin daxili turizmə maraq göstərməsinə təsir edəcək.

“Gürcüstanda kazinolarda oynayanların 17 faizi azərbaycanlıdır. Biz bu biznesi ölkəyə qaytarmağa çalışırıq. Bu gün kazinosuz turizmi inkişaf etdirmək dünya təcrübəsindən geri qalmaq deməkdir. Biz burada ölkəmizdə heç vaxt olmamış əcnəbilərin oynamasını, beynəlxalq poker turnirlərinin keçirilməsini istəyirik”, – deyə iş adamı vurğulayıb.

Emin Ağalarov həmçinin bildirib ki, Monako, Makao, Şimali Kipr və Las-Veqasla yanaşı, kazinoların sayına görə Azərbaycanın beşinci nöqtəyə çevrilməsi imkan verəcək ki, bu ilin sonuna qədər bu gün ölkəmizdə mövcud olmayan ən azı 12 beynəlxalq hotellə müqavilə imzalayaq və onları “Sea Breeze”də mehmanxana biznesi kimi birləşdirək.

İş adamı azyaşlıların bu oyun məkanlarına ayaq açacağına dair narahatlıqlara da aydınlıq gətirib və qeyd edib ki, 21 yaşdan aşağı şəxslər kazinoya buraxılmayacaqlar.

Eyni zamanda E.Ağalarov kazinoların açılmasının müvafiq olaraq daha çox iş yeri, dövlət üçün daha çox vergi və daha çox turist axını baxımından əhəmiyyət daşıdığını vurğulayıb. Bu isə ölkəmizin çiçəklənməsi deməkdir.