Ermənilər bir güllə ilə ikisini şəhid etdi | Ağdaban faciəsinin canlı şahidi

Ağdaban qətliamından 33 il ötür.

Faciə şahidlərindən olan Qiyas Alıyev Goranboyun Qaraçinar kəndində məskunlaşıb.

Doğma kəndini 25 yaşında tərk edən Ağdaban sakini o günləri ürək ağrısı ilə yada salır.

“1992-ci il aprelin 8-i, saat 06:00 radələrində ermənilər güclü ordu ilə kəndə hücum etdilər. Kənddə cəmi 8 avtomat var idi, başqa texnikamız yox idi. O günləri xatırlayanda insan özünü çox pis hiss edir. Nəslimizdən 32 nəfər şəhid oldu, 5 nəfəri evdə yandırdılar. Əmim 5 yaşlı qızını götürüb evdən çıxanda bir güllə ilə ikisini də şəhid etdilər. Yolu tanıdığımıza görə meşələrin arası ilə kənddən güclə çıxa bildik. İndi hər şey qaydasındadır. Şəhidlərimizin, qazilərimizin sayəsində torpaqlarımız azaddır”, ‒ sakin qeyd edib.

Q.Aliyev illər sonra doğma yurdunda olarkən keçirdiyi hisslərdən danışıb:

“Ata yurduma gedəndə çox pis oldum. Kənddə damı olan bir dənə də olsun ev qalmayıb. Kəndimdə yenidən yaşamaq ən böyük arzumdur”.

Qeyd edək ki, Ağdaban qətliamı zamanı 32 yerli sakin və onlara köməyə gələn 15 nəfər şəhid olub. 130-dan çox ev tamamilə yandırılıb, 779 nəfər dinc sakinə divan tutulub, 2 nəfər itkin düşüb.