Faydaları qədər ziyanlarıda çox olan qatıq | Qastrentoloqdan mühüm açıqlama

"Qatıq bir sıra faydalı xüsusiyyətlərə malikdir, lakin bəzi hallarda onun istifadəsinə əks-göstəriş ola bilər".

Bu barədə "İzvestiya" nəşrinə qastroenteroloq, tibb elmləri namizədi Yevgeni Belousov məlumat verib.

Mütəxəssisin fikrincə, qatığın əsas dəyəri onun tərkibində probiotiklərin ‒ sağlam bağırsaq mikroflorasını saxlayan faydalı bakteriyaların olmasıdır:

"Bu, həzmi yaxşılaşdırmağa, qida maddələrinin daha yaxşı mənimsənilməsinə və immunitet sistemini gücləndirməyə kömək edir. Qatığın tərkibində çoxlu vitamin və minerallar, o cümlədən kalsium, B vitaminləri, xüsusilə B12 və riboflavin, həmçinin maqnezium, fosfor və K2 vitamini var".

Y.Belousov qeyd edib ki, qatığın antioksidant xüsusiyyətləri hüceyrələri oksidləşdirici stresdən qorumağa kömək edir və onun orta miqdarda müntəzəm qəbulu toxluq hissini yaxşılaşdırmaqla çəkiyə nəzarət etməyə kömək edir.

Bununla belə, həkim qatığın hər kəsə uyğun olmadığı barədə xəbərdarlıq edib.

"Şiddətli laktoza dözümsüzlüyü və ya süd məhsulları allergiyası olan insanlar bundan çəkinməlidirlər. Əgər həzm probleminiz varsa, qatıq ehtiyatla pəhrizə daxil edilməli, yaşlı insanlar və zəifləmiş immunitet sistemi olanlar isə qəbuldan əvvəl həkimə müraciət etməlidirlər", ‒ deyə həkim qeyd edib.