“Fəhləlik etdirirdilər” | Restoranda xəsarət alan şəxsə kömək edilmir? - Baku TV

Bakının Şirin Mirzəyev küçəsində yerləşən restoranların birində baş vermiş bədbəxt hadisə müdir və keçmiş işçi arasında anlaşılmazlığa səbəb olub.

Şikayətçi Ümid Məmmədov bildirib ki, restoranda çalışdığı müddətdə ağır fiziki işlərə cəlb olunub və iş vaxtı ehtiyatsızlıqdan barmağını balta ilə kəsib. Hadisədən sonra işdən ayrıldığını deyən Ü.Məmmədov restoran rəhbərliyinin müalicə və əməliyyat üçün çəkdiyi xərcləri ödəməkdən boyun qaçırdığını iddia edib.

Restoranın müdiri Murad Qəhrəmanov isə hadisənin işçinin öz diqqətsizliyi səbəbindən baş verdiyini söyləyib. O qeyd edib ki, müəssisə rəhbərliyi dəymiş maddi və mənəvi ziyanı qarşılamağa hazırdır, lakin bunun üçün işçidən müraciət etdiyi tibb müəssisəsindən rəsmi bildiriş təqdim etməsi tələb olunub.

Məsələ ilə bağlı hüquqşünas Şamil Paşayev bildirib ki, əgər şəxs iş vaxtı xəsarət alıbsa, işəgötürən onun müalicəsi ilə bağlı zəruri tədbirləri görməlidir. Bununla belə, hüquqşünas vurğulayıb ki, işçi öz istəyinə uyğun məbləğ təyin edə bilməz. Hadisənin başvermə şəraiti, tərəflərin məsuliyyəti və real müalicə xərcləri ekspertiza tərəfindən və ya rəsmi sənədlər əsasında müəyyən olunmalıdır. Tərəflər qarşılıqlı razılığa gələ bilmədikləri təqdirdə Dövlət Əmək Müfəttişliyi Xidmətinə və ya məhkəməyə müraciət edilməsi tövsiyə olunur.