Hər şeyin qiymətində artım var | Ən çox bahalaşan məhsulların siyahısı açıqlandı

Dövlət Statistika Komitəsi noyabr ayında ən çox bahalaşan məhsul və xidmətlərin adını açıqlayıb.

Siyahıda 28 adda ərzaq məhsulu, geyimlər, inşaat materialları, mebellər, zərgərlik məmulatları, tibbi laboratoriya, stomatoloji, bərbərxana və kosmetoloji, hava nəqliyyatı ilə sərnişindaşıma xidmətləri yer alıb.

Ümumilikdə noyabr ayında inflyasiya 2023-cü ilin eyni ayına nisbətən 4,4 faiz olub. Halbuki aprel ayında illik inflyasiya 0 faiz təşkil edib.

Baku TV bahalaşma ilə bağlı vətəndaşların rəyini öyrənib.

“Son bir ayda kartof, soğan, yağlar bahalaşıb. Düzdür, ət ala bilmirik, qiymətindən xəbərimiz yoxdur. Deyilənə görə, ətin də qiyməti qalxıb”, – paytaxt sakini söyləyib.

İqtisadçı Xalid Kərimli mövzu ilə bağlı Baku TV-yə açıqlamasında bildirib ki, inflyasiyanın 4,4 faiz olması hökumətin və Mərkəzi Bankın gözləntilərinə uyğundur:

“Ümumiyyətlə, Mərkəzi Bank ölkədə hədəf inflyasiyasını 4 faiz kimi müəyyənləşdirib, 2-6 faizi isə dözümlülük çərçivəsi elan edib. İllik inflyasiyanın sürətlənməsinə bir sıra amillərin təsiri var. Buna misal olaraq iyulun əvvəlində dizel və “Aİ-92” markalı benzinin, eyni zamanda ictimai nəqliyyatın qiymət artımını göstərə bilərik”.

Ekspert onu da əlavə edib ki, inflyasiyanın məqbul səviyyədə olmasına baxmayaraq, 2025-ci ildə əməkhaqları, pensiyalar və digər ödənişlərdə artımın nəzərdə tutulması bahalaşmanın əhaliyə təsirini azaltmaq məqsədi daşıyır.