"Hərəsinə bir cür tərbiyə verilir, müəllim nəsə deməsin?!" - Bağçalarda kamera olmalıdır? - Baku TV

Son zamanlar dövlət bağçalarında qeydə alınan arzuolunmaz hallar vətəndaşların haqlı narazılığına səbəb olur. Paylaşımlarda istifadəçilərin dövlət bağçalarında da videonəzarət sisteminin olması ilə bağlı şərhlərinə rast gəlirik. Elə paytaxt sakinləri də bu fikirdədirlər.

Sakinlərdən biri son xəbərlərin bu addımın atılmasını zəruri etdiyini bildirib:

“Son zamanlar baş verənlər bağçalarda kameraların yerləşdirilməsini tələb edir. Üstəlik, səs yazısının da olması lazımdır. Vaxtilə övladımı özəl bağçaya qoyanda hərəkətlərə nəzarət etmək mümkün olsa da, səs eşidilmirdi. Hesab edirəm ki, bu da vacibdir, çünki uşaqlara təkcə fiziki deyil, səslə də təzyiq göstərilə bilər”.

Digər bir vətəndaş isə vurğulayıb:

“İndi nə dövlət, nə də özəl bağçaya tam etibar etmək olur. Uşaqlara psixotrop dərmanların verilməsi barədə eşitdiklərimiz insanı dəhşətə gətirir”.

Məsələyə münasibət bildirən təhsil eksperti Əmrah Həsənli qeyd edib ki, dövlət bağçalarında təlim-tərbiyə işi mexaniki qulluq anlayışından çıxmalı, uşağın hərtərəfli inkişafına yönəlməlidir:

“Valideynin ən böyük gözləntisi övladının təhlükəsizliyindən əmin olmaqdır. Özəl bağçalarda olduğu kimi, dövlət bağçalarında da kamera sistemlərinin tətbiqi həm şəffaflığı təmin edər, həm də valideynlə müəssisə arasında etimad mühitini möhkəmləndirər”.