İş zamanı etdiyimiz səhvlərin səbəbi bu imiş | Alimlər araşdırmanın nəticəsini açıqladı

İş yerində "qıcıqlandırıcı" musiqi əməkdaşlarda koqnitiv tükənməyə gətirib çıxarır, bu da onları səhvlər etməyə vadar edir.

ABŞ-nin Ohayo Universitetinin alimləri bu qənaətə gəliblər.

Araşdırmanın nəticələri "Journal of Applied Psychology" jurnalında dərc olunub.

Bildirilib ki, musiqini ən çox ticarət mərkəzlərinə, fitnes zallarına və ictimai iaşə müəssisələrinə baş çəkərkən eşitmək olar. Kompozisiyaların seçimi müəssisənin konsepsiyasından, hədəf auditoriyadan, günün vaxtından və digər amillərdən asılıdır, lakin demək olar ki, bütün hallarda bu, müştərilərə yönəldilib.

Musiqinin əmək məhsuldarlığına və işçilərin psixoloji vəziyyətinə necə təsir etdiyini öyrənmək üçün alimlər 166 könüllünün iştirakı ilə araşdırma aparıblar.

Təcrübədən əvvəl iştirakçılar musiqinin səsinin yüksəkliyi, sürəti, mürəkkəbliyi və emosional məzmunu ilə bağlı üstünlük verdikləri məqamları bildiriblər.

Daha sonra onlardan iki növ musiqi seçimindən birini dinləyərkən yaradıcı tapşırığı yerinə yetirmələri xahiş olunub. İlk pleylistə orta mürəkkəblikdə əyləncəli, şən pop-kompozisiyalar daxil olub. Digər seçim daha yavaş, "kədərli", aşağı səslə çalınan mahnılardan ibarət olub.

Nəticə göstərib ki, iştirakçılar musiqinin qıcıqlandırıcı olduğunu düşündükləri zaman çox vaxt koqnitiv tükənmə, yəni zehni yorğunluq hissi keçiriblər. Bu problem xüsusilə "stimulları seçmə qabiliyyəti olmayan" insanlar adlanan şəxslərdə daha kəskin şəkildə özünü göstərib.

Diqqətini cəmləməkdə çətinlik çəkənlər tez-tez uyğun olmayan musiqi səbəbindən əhvali-ruhiyyələrinin və iş qabiliyyətlərinin aşağı düşdüyünü ifadə ediblər.