Kinostudiya ərazisindəki partlayışla bağlı üç qurumdan birgə məlumat

İyunun 26-da saat 23:00 radələrində paytaxtın Yasamal rayonunda yerləşən Cəfər Cabbarlı adına "Azərbaycanfilm" kinostudiyası ərazisində baş vermiş yanğınla müşayiət olunan partlayışla bağlı əraziyə Baş Prokurorluq əməkdaşları ilə yanaşı, Fövqəladə Hallar Nazirliyi və Minatəmizləmə Agentliyinin operativ qrupları cəlb olunub və hadisə yerinə baxış keçirilib.

Bu barədə üç qurum birgə məlumat yayıb.

Bildirilir ki, əldə edilən sübutlar arasında patronlar, fişənglər, gilizlər, propan qaz balonları, eləcə də təlim məqsədilə istifadə olunan müxtəlif növ partlayıcı vasitələr də aşkarlanıb.

Hazırda prokurorluq əməkdaşları tərəfindən hadisə yerinə baxış, FHN və ANAMA-nın əməkdaşları tərəfindən isə ərazidə zərərsizləşdirmə və təmizləmə işləri həyata keçirilir.

Təhlükəsizliyin təmin edilməsi məqsədilə hadisə yerinə təcili tibbi yardım briqadaları da cəlb olunub.