Kühül dağı qanunsuz zəbt edilib? | “Bilmirəm ki, baxan qurum yoxdur, yoxsa...”

Sabunçu rayonu Bakıxanov qəsəbəsindəki “Kühül dağı” Bakı sakinlərinin, xüsusilə də alpinistlərin və alpinizmə marağı olanların sevimli məkanlarından biridir.

Alpinistlərin sözlərinə görə, son vaxtlar ərazi baxımsız vəziyyətdə qalıb və qanunsuz olaraq zəbt edilir.

“Bura millətindir, hər hansı vətəndaşın şəxsi mülkiyyəti deyil ki, gəlib ev tiksin. Bilmirəm, bu problemin öhdəsindən gələn yoxdur, yoxsa həlli ilə məşğul olan aidiyyəti qurum mövcud deyil”, – deyə alpinist Fərdin İsazadə narazılığını bildirib.

Məsələ ilə bağlı Sabunçu Rayon İcra Hakimiyyətindən bildirilib ki, Bakıxanov qəsəbəsi, 4-cü Bərgüşad küçəsində satışının həyata keçirildiyi deyilən torpaq sahələri “Kühül dağı” adlanan təbiət abidəsinin üzərindədir. Q

eyd edilən torpaq sahəsində hər hansı tikinti-quraşdırma işlərinin aparılmaması üçün “Azərbaycan Alpinizm Federasiyası İctimai Birliyi” və Bakıxanov Bələdiyyəsindən Sabunçu Rayon İcra Hakimiyyətinə bir neçə müraciət daxil olub. Müraciətlərə əsasən torpaq sahələrində tikinti-quraşdırma işlərinin həyata keçirilməsinə icazə verilməsi barədə Sabunçu Rayon İcra Hakimiyyəti tərəfindən inzibati icraat başlanıb.

Bununla bağlı torpaq sahələrinin mülkiyyətçilərinə məlumat göndərilib. İnzibati icraat yekunlaşdıqdan sonra məsələ ilə bağlı yekun qərar tərəflərə bildiriləcək.