Media subyektləri vergidən azad edilir

Milli Məclisin martın 7-də keçirilən plenar iclasında media subyektləri ilə bağlı Vergi Məcəlləsinə bir neçə dəyişiklik təklif edilib.

Təkliflərdən biri media subyektlərinin əldə etdikləri gəlirlər, reklam gəlirləri və müvafiq dövlət qurumu tərəfindən verilən maddi yardımların gəlir vergisindən azad olunmasını nəzərdə tutur.

İclasın gündəliyinə salınan digər dəyişiklik media subyektləri tərəfindən istehsal olunan media məhsullarının təqdim edilməsinin əlavə dəyər vergisindən azad olunması ilə bağlıdır.

Hər iki azadolmalar 2023-cü il yanvarın 1-dən tətbiq olunmaqla 3 il müddətində qüvvədə qalacaq və audiovizual media subyektlərinə şamil olunmayacaq.

Həmçinin media haqqında qanunvericiliyin pozulmasına görə cərimələr də artırılır. Belə ki, İnzibati Xətalar Məcəlləsinə təklif edilən dəyişikliyə əsasən, media məhsullarının qanunla müəyyən edilən qaydada yayımına mane olmağa görə fiziki şəxslər 200 manatdan 300 manatadək məbləğdə cərimə ediləcək.

Eyni zamanda jurnalistlərin peşəkar fəaliyyətinə qanunsuz müdaxilə edilməsinə görə 300 manatdan 600 manatadək məbləğdə cərimə müəyyənləşir.