Nəbatat Bağında baş verən tükürpərdici hadisənin təfərrüatı | Ekspertdən təcili xəbərdarlıq

Xəbər verdiyimiz kimi, Mərkəzi Nəbatat Bağında azyaşlını ilan sancıb. Hadisənin insanların tez-tez üz tutduğu bir məkanda baş verməsi xüsusilə yay aylarında təhlükəsizlik tədbirlərinin nə dərəcədə yetərli olduğu barədə suallar doğurur.

Bu kimi məkanlarda, ümumiyyətlə, hansısa qabaqlayıcı tədbirlər görülür?

Məsələ ilə bağlı Mərkəzi Nəbatat Bağından açıqlama verilib.

“Mərkəzi Nəbatat Bağı təbiətlə vəhdət təşkil edən bir ərazi kimi flora və faunanın qorunmasına xüsusi diqqət yetirir. Bu səbəbdən orada yaşayan istənilən növ canlıların, o cümlədən həşəratların mövcudluğu mümkündür. Nəbatat Bağında yaşayan canlılara müdaxilə isə təbiətlə balansın pozulması ilə nəticələnər ki, bu da ekoloji baxımdan mənfi təsirlərə yol açar. Həmçinin sakinlərdən və şəhərimizin qonaqlarından Mərkəzi Nəbatat Bağında təyin olunmuş yerlərdə gəzmələri, azyaşlıları diqqətdən kənar qoymamaları xahiş edilir”, ‒ deyə açıqlamada qeyd olunub.

Mütəxəssislər isə bildirirlər ki, payız və yay aylarında ilanların aktivliyi artır, bu səbəbdən park və bağlarda daha ciddi profilaktik tədbirlər görülməlidir.

“Azərbaycanda ilanların ovlanması ilə məşğul olan, monitorinq aparan dövlət qurumu yoxdur. İlanlar əsasən Mərkəzi Nəbatat Bağının ucqar hissələrində müşahidə olunur. Lakin son dövrlərdə bu ərazidə aparılan rekonstruksiya işləri nəticəsində həmin lokal ərazilərdə yaşayan ilanlar bağın digər sahələrinə yayılıblar”, ‒ deyə Zoologiya İnstitutunun əməkdaşı Təvəkkül İsgəndərov bildirib.

Qeyd edək ki, ilan sancan azyaşlı Kliniki Tibbi Mərkəzin Toksikologiya şöbəsinə yerləşdirilib. Dərhal ona ilan zəhəri əleyhinə zərdab tətbiq olunub. Müalicəsi isə davam etdirilir. Vəziyyəti ağır qiymətləndirilir.