Oruc tutanlar necə qidalanmalıdır? | İftarı su ilə açırsınızsa...

Ramazan ayında orqanizmin suya olan ehtiyacının ödənilməsi daha da önəm kəsb edir. Susuzluq zamanı yarana biləcək bir çox xəstəliyin qarşısını almaq üçün Ramazan ayında iftardan başlayaraq imsak bitən vaxta kimi ən az 2,5 litr su içmək məsləhət görülür.

Xüsusilə yaşlılar, böyrək, ürək və təzyiq xəstələri üçün maye istehlakını həkim nəzarəti altında hesablayıb ona uyğun tətbiq etmək daha yaxşı olar. İçdiyiniz suyun soyuq olmamasına diqqət etməyiniz vacibdir. Belə ki, soyuq su mədədə sıxılmalara səbəb ola bilər, həzmi çətinləşdirir və həzm pozğunluğuna gətirib çıxarır.

Həkimlərin fikrincə, iftar ilə imsak arasında istehlak edilən suya təzə limon dilimləri, nanə yarpağı və ya darçın əlavə edilməsi suya fərqli bir ətir qataraq içməyi asanlaşdırmaqla yanaşı, mədəni rahatlaşdıra və şirniyyat yemək istəyini azaltmağa kömək edir.

Oruc tutarkən susuzluğa qarşı alınacaq ehtiyat tədbirlərindən biri də tərkibində su miqdarı yüksək olan tərəvəz və meyvələrdən faydalanmaqdır. Bu səbəbdən iftar süfrəsində salat və tərəvəz yeməklərinə daha çox yer verilə bilər.