Paytaxtda hansı dəyişikliklər olacaq? - Bakının baş planı barədə əsas detallar

“Bakı şəhərinin Baş planında bir sıra mühüm prinsiplər nəzərdə tutulub. Bu prinsiplərdən ən əsası çoxmərkəzlilik sisteminin yaradılmasıdır”.

Bu sözləri Bakı Şəhər Memarlıq və Şəhərsalma Baş İdarəsinin rəisi Riad Qasımov Bakı şəhərinin 2040-cı ilədək olan Baş planı haqqında danışarkən deyib:

“Hazırda Bakı monoşəhərdir. İdeya ondan ibarətdir ki, 2040-cı ilə qədər Bakının bir neçə mərkəzi olsun və bu mərkəzlər bir-biri ilə “Yaşıl koridor” vasitəsilə bağlansın.

“Yaşıl koridor”ların ekoloji cəhətdən çox böyük əhəmiyyəti var. COP29-da buna çox böyük əhəmiyyət verilir. Koridorlar həm şəhər daxilində, həm də şəhərdən kənarda olacaq. Həmin dəhlizlərin daxilində parklar və yaşıl nəqliyyat növləri istifadə ediləcək”.

Riad Qasımov qeyd edib ki, prinsiplərdən biri də mədəni irsin qorunmasıdır:

“Ümumiyyətlə, yeni şəhər iqtisadiyyatının yaradılması fikirlərimiz arasındadır. Bu, yaşıl nəqliyyat və sahibkarlıq növündən asılı ola bilər. 2040-cı ilə qədər şəhərimiz məhz bu tərzdə inkişaf edəcək. Şəhərin dayanıqlığını təmin etmək məqsədilə beynəlxalq təcrübəyə əsaslanaraq Baş planda dəyişikliklər ola bilər. Xətai və Nəsimi rayonları ərazilərində müvafiq işlərin ilkin mərhələdə aparılması tətbiq edilir.

Yaxın zamanlarda yeni parkların və yaşıl zonaların yaradılmasına başlanılacaq. Bu da Bakıda ekoloji tarazlığın və ekoloji vəziyyətin daha da yaxşı olmasına gətirib çıxaracaq”.