Pişik dişləyən uşaq 4 ay sonra görün hansı hala düşdü | "Belə gəzməkləri təhlükəlidir" - Baku TV

Türkiyənin Diyarbəkir şəhərində dörd yaşlı qız uşağı küçə pişiyi tərəfindən dişləndikdən dörd ay sonra ağır vəziyyətdə xəstəxanaya yerləşdirilib. Hadisədən dərhal sonra xəstəxanaya aparılan azyaşlı müayinə edildikdən sonra evə buraxılsa da, aylar sonra vəziyyəti kəskin pisləşib. Uşaqda quduzluq virusu təsdiqlənib və o, süni tənəffüs aparatına qoşulub.

Məsələ ilə bağlı həkim, professor Adil Qeybulla bildirib ki, sahibsiz heyvanlar quduzluq baxımından ciddi təhlükə mənbəyidir:

"Avropa ölkələrində küçədə sahibsiz pişik və ya itə rast gəlməzsiniz. Onların hamısı evdə, baytar nəzarəti altında saxlanılır. Türkiyədə və bizdə isə küçələrdə sahibsiz heyvanlar gəzir. İstənilən halda həmin heyvanlar quduzluğa yoluxa bilər. Quduzluq zamanı mərkəzi sinir sistemində ağır dəyişikliklər baş verir və heyvanlar insanlara hücum edir".

Professor vurğulayıb ki, heyvan dişləməsi zamanı vaxt itirmədən həkimə müraciət olunmalıdır:

"İstənilən heyvan dişləməsi və ya cırmaqlaması zamanı zərərçəkən mütləq xəstəxanaya çatdırılmalı, ona quduzluq əleyhinə vaksin vurulmalıdır. Bu peyvənd profilaktik məqsədlə edilir, çünki heyvanın quduz olub-olmadığı dərhal məlum olmur. Lakin peyvənd böyük bir təhlükənin qarşısını alır. Çünki xəstəlik artıq klinik əlamətlərlə büruzə verdikdən sonra onun müalicəsi təəssüf ki, mümkün olmur".