Pul verməsək, imtahanlara buraxılmayacağıq | Tələbələr universitetdən şikayətləndi - Baku TV

Qərbi Kaspi Universitetinin bir qrup tələbəsi iddia edir ki, onlar dövlət sifarişi ilə, yəni ödənişsiz əsaslarla təhsil haqqı qazanıblar. Lakin universitet rəhbərliyi onlardan illik ödəniş tələb edir. Bildirilir ki, səbəb kimi dövlət tərəfindən universitetə ödənişin edilmədiyi göstərilir.

Tələbələrin iddiasına görə, ödənişin edilməməsi halında semestr imtahanlarına buraxılmayacaqları ilə bağlı xəbərdarlıq alıblar.

“Həm stipendiyamızı ödəmirlər, həm də dövlət tərəfindən ödənilən təhsil haqqından əlavə olaraq bizdən borc adı ilə pul tələb edirlər. Bu borcu ödəməsək, may imtahanlarına buraxılmayacağımızı bildirirlər”, – tələbələrdən biri söyləyib.

“Bizə müəyyən bir siyahı təqdim olundu və hər bir tələbənin qarşısında borc göstərildi. Bu borcun səbəbini soruşduqda bizə Elm və Təhsil Nazirliyi tərəfindən təhsil haqqımızın yarımçıq ödəndiyi və geri qalan məbləği bizim ödəməli olduğumuz bildirildi. Rəsmi sənəd tələb etdiyimiz halda isə heç nə təqdim olunmadı”, – başqa bir tələbə qeyd edib.

Məsələ ilə bağlı Elm və Təhsil Nazirliyindən bildirilib ki, dövlət sifarişi əsasında təhsil alan tələbələrdən təhsil haqqı adı ilə hər hansı ödənişin tələb edilməsi qanunaziddir: “Dövlət sifarişi ilə təhsil alan tələbələrin təhsil haqları dövlət tərəfindən müvafiq qaydada təhsil müəssisələrinə ödənilir. Bu baxımdan nə dövlət, nə də özəl ali təhsil müəssisəsi tələbədən həmin ödənişin hər hansı bir hissəsini tələb edə bilməz”.