Qəbz verməyən aptekləri nə qədər cərimə gözləyir?

Qaydalara əsasən, nağdsız ödəniş zamanı əlavə dəyər vergisinin 17,5 %-i, nağd ödənişlər zamanı isə 5 %-i istehlakçıya geri qaytarılır.

Lakin bəzi apteklərdə bu qaydalara əməl edilmir. Sakinlər bildiriblər ki, özləri tələb etmədikləri təqdirdə əlavə dəyər vergisini ala bilmək üçün əczaxanalarda qəbz vermirlər.

“Dərmanı verirlər, amma dilinlə istəməsən, qəbzi vermirlər. Qiymət də od tutub yanır. Kasıbçılıqdır, çörəyi, digər şeyləri onunla alırıq”, – sakin deyib.

Bəs görəsən, ƏDV qəbzini tətbiq etməyən müəssisələrlə bağlı qanunvericilikdə hansı tədbirlər nəzərdə tutulub?

Dövlət Vergi Xidmətinin şöbə rəisi Şahin Məmmədov bildirib ki, Vergi Məcəlləsinin müddəalarına əsasən, alıcıya təqdim edilməli olan qəbzin verilməməsinə görə maliyyə sanksiyası tətbiq edilir:

“Bu təqvim ili ərzində belə hallara birinci dəfə yol verildikdə 1 000 manat, ikinci dəfə yol verildikdə 3 000 manat, üç və daha çox dəfə yol verildikdə isə 6 000 manat məbləğində maliyyə sanksiyası tətbiq edilir”.