"Əziyyəti qiymətini ödəmir" | Heyvandarlıq sahəsindəki mövcud vəziyyət və qiymət - Baku TV

İsmayıllı rayonunun Lahıc qəsəbəsində 20 ildən artıqdır çobanlıqla məşğul olan Elxan Vəliyev dağ şəraitində heyvandarlığın çətinliklərindən danışıb.

O bildirib ki, heyvan saxlamaq kənardan asan görünsə də, əslində, böyük zəhmət tələb edir və əksər hallarda çəkilən əziyyət öz qiymətini ödəmir.

Ətin qiyməti ilə bağlı sualı cavablandıran Elxan Vəliyev qeyd edib ki, çəkilən zəhmətin müqabilində hazırkı qiymətlər baha hesab edilməməlidir.

O, quzu ətini qəssablara 18 manata verdiyini, qəssabların isə onu 19-20 manata satdığını bildirib. Keçi ətinin qiyməti isə 15-16 manat təşkil edir.

E.Vəliyev həmçinin dağlıq zonada heyvan saxlamağın böyük xərclər yaratdığını vurğulayıb:

“Bizim dağ zonasında heyvandarlıq çox xərclidir. Buranın qışı sərt keçdiyindən heyvanlar ilin 6 ayını tövlədə qalır. Həmin müddətdə onları öz vəsaitimizlə yemləyib saxlamalı oluruq. Kənardan baxanlara hər şey asan gəlir, amma bu, çox əziyyətli işdir”.