"İdrak" liseyində müəllimini güllələyən şagirdlə bağlı yeni detallar üzə çıxdı - Baku TV

Bakı şəhərindəki “İdrak” liseyində müəllimini güllələyən şagirdlə bağlı yeni detallar üzə çıxıb.

Belə ki, şagirdin “TikTok” hesabındakı repostlar sosial şəbəkə istifadəçilərinin diqqətini çəkib.

Bildirilir ki, paylaşımlarda 2018-ci ildə Kerç şəhərində baş verən faciənin iştirakçısı Vladislav Roslyakovla bağlı məzmun üstünlük təşkil edir.

Repostların böyük hissəsinin məhz bu şəxsə həsr olunması şagirdin ona xüsusi maraq göstərdiyini deməyə əsas verir.

Xatırladaq ki, Vladislav Roslyakov 2018-ci ilin oktyabrında oxuduğu Kerç Politexnik Kollecində silahlı hücum törətmişdi. Hücumda azı 19 nəfər ölüb, onlarla şəxs yaralanmışdı. Həmin hadisə Rusiya tarixində təhsil müəssisələrində baş verən ən ağır hücumlardan biri kimi qiymətləndirilir və sonradan “Kerç Kolumbaynı” adı ilə tanınıb.

Araşdırmalara görə, bu olay ABŞ-də baş vermiş Kolumbayn məktəb hadisəsindən təsirlənərək həyata keçirilib.