"O qədər adamı Rusiyaya apardılar" - 20 Yanvar faciəsi Mirnaib Həsənoğlunun obyektivindən - Baku TV

36 il əvvəl Azərbaycan xalqının başına gətirilən müsibətin bu gün onminlərlə, bəlkə də, yüzminlərlə şahidi var. Onlardan biri 20 Yanvar hadisələrini o gecə şəkillərdə donduran cəsur fotoqraf Mirnaib Həsənoğludur.

Onun sözlərinə görə, 20 Yanvar haqqında çox yazıla, çox danışıla bilər, amma heç bir dəlil film və foto qədər hadisələri olduğu kimi göstərə bilməz.

“Gecə saat 1-ə işləmiş şəhərə girməyə başladılar. Bir gecənin içində inamımız qırıldı. Sən demə, bu “dövlət” dediyimiz bizim dövlətimiz deyilmiş. O vaxt meyitləri götürüb dənizdə batırmaq istəyiblər. Həmin gün bir gecədə qərənfilin statusu dəyişdi. O gül bütün Sovet hökumətinin günahlarını boynuna götürdü”, – deyə Mirnaib Həsənoğlu əlavə edib.

O qanlı gecəni olduğu kimi dünyaya çatdıran fotoqraflar arasında Mirnaib Həsənoğlu ilə yanaşı, Oleq Litvin, Yaşar Xəlilov, Hüseyn Hüseynzadə, Rafiq Nağıyev, Ağali Məmmədov, Rasim Sadıqov, Mehdi Abbasov, Fərid Xayrulin, Tahir Cəfərov, Fərid Əşrəfoğlu və Malik Şərifov da olub.

Qeyd edək ki, çəkilən fotolar Azərbaycan Fotoqrafları Birliyinin arxivində qorunub saxlanılır.