"Robot təkəri necə dəyişəcək?!" - İnsan əməyinə ehtiyac qalmayacaq? - "Hamısını robot edəcək"

"Microsoft" şirkətinin tədqiqatçıları 40-dan çox peşənin robotların təsirinə məruz qalacağını bildirirlər. Bu göstərici gələcəkdə kütləvi işsizlik dalğasının yaranacağı ilə bağlı narahatlıqları artırır.

Bəs robotlar insan əməyini tamamilə əvəz edə bilərmi?

Müxtəlif sahələrin mütəxəssisləri bu suala fərqli münasibət bildiriblər.

Cərrah Eldar Eldarlı hesab edir ki, robotların rolu yalnız həkimə kömək etməkdən ibarət ola bilər:

"Robotun işi, sadəcə, həkimə kömək etmək ola bilər. Çünki robotda hiss və duyğu yoxdur. Məsələn, bir xəstəmin barmağında yara var idi. Göstərişə uyğun olaraq xəstənin barmağı kəsilməli idi. Amma həmin şəxs barmağının kəsilməsini istəmirdi. Özümüzü xəstənin yerinə qoyaraq riski üzərimizə götürdük və barmağı qoruya bildik. Həmin addımımız müsbət nəticə verdi. Əgər yerimdə robot olsaydı, təlimata uyğun olaraq barmağı kəsəcəkdi. Çünki onda insani düşüncə və özünü xəstənin yerinə qoymaq qabiliyyəti yoxdur".

30 illik təcrübəyə malik zərgər Eduard Şamaryayev isə müasir texnologiyaların tətbiqini müsbət qiymətləndirir:

"Bir zərgər kimi artıq əvvəlki əziyyəti çəkmək istəmirəm. Müasir texnologiyalardan istifadə edərək daha asan və simmetrik cəhətdən dəqiq bəzək əşyaları hazırlamağa üstünlük verirəm. Bir metalı bəzək əşyası formasına gətirmək üçün ən azı bir gün vaxt lazımdır. Lakin süni intellekt və 3D printerlər vasitəsilə günə 100–200 ədəd bəzək əşyası hazırlamaq mümkündür. Bu isə təbii ki, məhsulun maya dəyərini xeyli ucuzlaşdırır".