SSRİ bayrağını qaldıran şəxslə bağlı hansı qərar verildi? | Qalmaqallı hadisənin detalları

İmişli rayonunda 9 May – faşizm üzərində Qələbə Günü münasibətilə keçirilən tədbirdə maraqlı hadisə qeydə alınıb.

Sosial şəbəkələrdə yayılan videoda görsənir ki, tədbirin keçirildiyi xiyabanda Azərbaycan Dövlət Bayrağı ilə yanaşı, keçmiş SSRİ bayrağı da dalğalanıb. Üstəlik, "Qələbə Günü" sovet mahnısı da səsləndirilib.

Məsələ ilə bağlı Azərbaycan Ağsaqqallar Şurasının İdarə Heyətinin növbədənkənar iclası keçirilib. İclasda informasiya resurslarında yayılmış, İmişli Rayon Ağsaqqallar Şurasının sədri Saleh Səmədovun mayın 9-da İmişlinin Sarıxanlı kəndində faşizm üzərində Qələbə Günü münasibətilə təşkil olunan tədbirdə SSRİ bayrağı altında, sinəsində rus imperiyasının rəmzi olan “Georgi lenti” ilə çıxış etməsi ilə əlaqədar məsələyə baxılıb.

İdarə Heyəti Şuranın adına ləkə gətirən hərəkətlərə yol verdiyinə, Azərbaycan Ağsaqqallar Şurasının Nizamnamə tələblərini kobud şəkildə pozduğuna görə Saleh Səmədovun İmişli Rayon Ağsaqqallar Şurasının sədri vəzifəsindən azad edilməsi, o cümlədən Azərbaycan Ağsaqqallar Şurasının üzvlüyündən çıxarılması barədə qərar qəbul edib.