Tələbələr 2000 verməsələr, məzun ola bilmirlər? | “Narazılıqları bilirik...” - Baku TV

İddialara görə, Azərbaycan Dövlət Pedaqoji Universitetinin Riyaziyyat fakültəsində bəzi tələbələrdən məzun olmaq üçün 1500–2000 manat, bəzi hallarda isə daha yüksək məbləğdə vəsait tələb olunur.

Həmçinin bildirilir ki, imtahan nəticələri obyektiv qiymətləndirilmir və tələbələrin şikayət etmələrinin qarşısını almaq məqsədilə onlara təzyiq göstərilir.

ADPU-nun şöbə müdiri Taleh Mirzəyev isə bildirib ki, imtahan nəticələri bir neçə müəllim tərəfindən paralel şəkildə yoxlanıldığı üçün nəticələrin açıqlanması müəyyən qədər gecikir.

“Sosial şəbəkələrdə yayılan narahatlıqlardan xəbərdarıq və bu məsələlərlə bağlı hüquqi mexanizmlər mövcuddur. İmtahan nəticələrinə dair Apellyasiya Komissiyası, imtahan prosesində yaranan qüsurlarla bağlı isə İmtahan Qərargahı fəaliyyət göstərir.

Məzun olmaq, diplom müdafiəsi və ya hər hansı imtahanla əlaqədar müəllimlər və ya digər şəxslər tərəfindən tələbələrdən vəsait tələb olunması barədə yayılan məlumatlar hazırda bizim üçün iddia xarakteri daşıyır. Buna baxmayaraq, universitet rəhbərliyi tərəfindən bütün tələbələrlə fərdi görüşlər keçirilir”, – deyə Taleh Mirzəyev qeyd edib.