Temperaturun neçə olması əlilliyə səbəb olur? - Elm adamları bilinməyənləri açıqladı

Uzunmüddətli istiliyə məruz qalma insan orqanizmində molekulyar səviyyədə qocalmanı sürətləndirə bilər.

ABŞ-də aparılan tədqiqatın nəticələri belə deməyə əsas verir. Təcrübədə 56 yaş və yuxarı 3800 nəfər iştirak edib.

Tədqiqatçılar “epigenetik saat” adlanan DNT-dəki kimyəvi dəyişiklikləri təhlil edərək bunu ABŞ-nin istilik xəritələri ilə müqayisə ediblər. Məlum olub ki, 26,7 və 32,2°C-dən yüksək temperaturda daha çox gün keçirən insanların molekulyar yaşı soyuq iqlimdə yaşayanlardan daha yüksəkdir. İsti günlərin 10 faizlik artımı molekulyar yaşın 0,12 il artması ilə əlaqələndirilib.

Elm adamlarının sözlərinə görə, fiziki sağlamlıq problemləri dərhal ortaya çıxmasa da, istiliyin orqanizmə hüceyrə və molekulyar səviyyədə təsiri ola bilər. Bu təsirlər isə gələcəkdə sağlamlıq problemlərinə və hətta əlilliyə gətirib çıxara bilər. Araşdırma iqlim dəyişikliyinin insan biologiyasına təsirini daha yaxşı anlamağa kömək edə bilər.