Təngə gələn sakinlər imdad dilədi | “Pul verməyəndə qapını sındırırlar, hanı bələdiyyə?!”

Abşeron rayonu, Masazır qəsəbəsi, Şəfiqə Axundova küçəsində yaşayan sakinlər yol problemindən şikayətçidirlər.

Onlar iddia edirlər ki, bununla bağlı dəfələrlə aidiyyəti qurumlara müraciət etsələr də, məsələ həllini tapmayıb.

Sakinlər narazılıqlarını Baku TV ilə bölüşüblər.

“Bura nə taksi gəlir, nə də təcili yardım. Yolda yeriyə bilmirik. Əsəbimdən ağlayıram. Dərdimizi kimə deyək?! Biz də yaşamaq istəyirik”, – onlardan biri söyləyib.

Digər bir vətəndaş isə belə deyib: “Yollar bərbad haldadır. Burada avtomobil idarə etmək olmur, maşın pis vəziyyətə düşür”.

Problemlə bağlı Masazır bələdiyyəsindən bildirilib ki, daxili küçələr bələdiyyələrin balansında olduğu üçün yerli özünüidarəetmə orqanlarının büdcələri imkan verdikcə kənd ərazisində yolların abadlaşdırılması işləri həyata keçirilir:

“Bələdiyyələrin büdcələri sakinlər tərəfindən verilən vergilər əsasında formalaşdığından yeni küçələrin asfaltlanmasında müəyyən yubanmalar müşahidə edilməkdədir. Yaxın müddətdə Şəfiqə Axundova küçəsi də daxil olmaqla beş küçə asfaltlanaraq sakinlərin istifadəsinə veriləcək. Su xəttində baş verən qəza ilə bağlı isə aidiyyəti qurumlara müraciət olunub”.