Tibbi cihazlarda ölüm təhlükəsi

Azad İstehlakçılar Birliyinin sədri Eyyub Hüseynov ölkədəki tibbi cihazların kalibrasiya, yəni yoxlanış prosesində saxtakarlığa yol verilməsi ilə bağlı həyəcan təbili çalır.

Bu isə o deməkdir ki, bir ətək pul töküb müayinə olunduğumuz ən bahalı cihazlar belə səhv diaqnozla üz-üzə qalmağımıza səbəb ola bilər. Təəssüflər olsun ki, son illər bu kimi hadisələrlə, demək olar ki, əksəriyyət üzləşir.

Tanınmış həkim, tibb üzrə elmlər doktoru Adil Qeybulla bildirir ki, tibbi avadanlıqlar ölkəyə gətirilərkən gömrük orqanlarında yoxlanılsa da, həmin cihazların sonrakı aqibəti müəmmalı qalır.

Səhiyyə müəssisələrində tibbi cihazların yoxlanılmasına Antiinhisar və İstehlak Bazarına Nəzarət Dövlət Xidməti nəzarət edir. Lakin məsələ ilə bağlı quruma müraciət edən Baku TV-nin suallarına cavab verilməyib.

Onu da qeyd edək ki, martın 4-də Fövqəladə Hallar Nazirliyi bir sıra tibb müəssisələrində rentgen kabinetlərinin fəaliyyətini dayandırıb. Səbəb kimi həmin səhiyyə ocaqlarında radiasiya təhlükəsizliyi tələblərinə riayət edilməməsi göstərilib.