Tovuz sakininin probleminə qurumlar nə cavab verdi?

Tovuzun Alakol kənd sakini Taleh Babayev Baku TV-nin qaynar xəttinə müraciət edib.

O, üzləşdiyi çətinliklərlə bağlı aidiyyəti qurumlardan kömək istəyir.

“Üç övladım var, onlardan biri 2-ci qrup əlildir. İş tapa bilmirəm. Sosial yardım üçün müraciət etmişdim. Gəlib baxış keçirdilər, amma vergi ödəmədiyim üçün imtina cavabı gəldi. Uşağım xəstə olduğuna görə vergini ödəyə bilməmişəm, həmin pulu müalicəsinə xərcləmişəm”, – kənd sakini söyləyib.

Məsələ ilə bağlı Dövlət Məşğulluq Agentliyindən Baku TV-nin sorğusuna cavab olaraq bildirilib ki, Taleh Babayev iş axtaran kimi qeydiyyata alınıb. Müxtəlif idarə və özəl sahələrdə ona iş təklif olunub, lakin o, yaşadığı ərazidə iş istədiyindən işlə təmin olunmayıb.

Dövlət Sosial Müdafiə Fondundan isə bildirilib ki, Taleh Babayev 2024-cü ildə etdiyi müraciətə əsasən iyulun 1-dən 1 il müddətinə 435 manat olmaqla ünvanlı sosial yardım alıb. Bundan sonra elektron sistemə yenidən müraciət əsasında ailəyə 1 il müddətinə avqustun 1-dən etibarən 474 manat məbləğində sosial yardım təyin olunub və sentyabr ayı ilə birlikdə hesabına köçürüləcək.