“Valideyni səs-küy saldı ki...” | Kənddə qalmaqal: 14 yaşlı qızı nişanladılar?

Sabirabadın Əsədli kəndində 20 yaşlı oğlanın 14 yaşlı qızla nişanlanması ilə bağlı xəbərlər yayılıb.

Yeniyetmə qızın anası Gülər Fərzəliyeva isə bu xəbərlərin yalan olduğunu söyləyib:

“Həyat yoldaşımla həmin oğlanın atası məclislərdən birində yeyib-içiblər. Sərxoş olan oğlanın atası qızımızı oğluna istədiyini deyib. Həyat yoldaşım isə qızımızın azyaşlı olduğunu söyləyib. Bundan sonra evimizə də heç kim gəlməyib, nişan olmayıb”.

Məsələ ilə bağlı Daxili İşlər Nazirliyindən bildirilib ki, daxil olmuş məlumatla əlaqədar şöbə əməkdaşları tərəfindən dərhal qanunvericiliyə əsasən, tədbirlər həyata keçirilib, hər 2 tərəf polis şöbəsinə dəvət olunub:

“Araşdırmalarla oğlanın 20, qızın isə 14 yaşı olması müəyyən edilib. Ailələr ilə izahedici söhbətlər aparılıb və qeyd edilən halın qanunla qadağan olduğu izah edilib.

Lakin həmin vaxt yeniyetmə qızın valideyni Hikmət Fərzəliyev, eləcə də Elvin Məmmədli səs-küy salaraq polisin xidməti fəaliyyətinə mane olublar. Onları nizam-intizama dəvət etsələr də, həmin şəxslər hərəkətlərini davam etdirərək ictimai qaydanı pozublar.

Hər 2 şəxs barəsində İnzibati Xətalar Məcəlləsinin müvafiq maddəsi ilə protokol tərtib olunub və məhkəməyə göndərilib. Məhkəmənin qərarı ilə onlar 8 sutka inzibati qaydada həbs olunublar”.