Xərçəng şişləri bu əlamətləri yarada bilər | Siçanlar üzərində təcrübə aparıldı

Xərçəng şişləri insan beyninə təsir edərək yaşam həvəsini azalda bilər.

Bu barədə "Science" jurnalında dərc edilən yeni tədqiqatda deyilir.

Vaşinqton Universitetinin mütəxəssisləri xərçəngin insan psixologiyasına təsirinin şokedici mexanizmini üzə çıxarıblar.

Onlar sübut ediblər ki, şişlər beyni yenidən proqramlaşdıraraq xəstənin həyatda qalmaq istəyini azalda bilir.

Siçanlar üzərində aparılan təcrübə zamanı alimlər xərçəngə bağlı kaxeksiya, yəni kəskin arıqlama və əzələ itkisi modelindən istifadə ediblər. Məlum olub ki, şişlər "area postrema" adlanan və qan-beyin baryeri olmayan beyin nahiyəsinə daxil olaraq iltihabi molekullar ifraz edir. Bu siqnallar motivasiya mərkəzi hesab edilən beyin nahiyəsində dopaminin sintezini zəiflədir. Nəticədə hətta sadə hərəkətlər belə xəstəyə dözülməz və mümkünsüz görünür.

Tədqiqatda siçanların fiziki imkanları olduğu halda, güc tələb edən tapşırıqlardan imtina etdikləri müşahidə edilib.

Bu davranış insanlarda da özünü büruzə verib: pasiyentlər kifayət qədər qidalanma və müalicəyə baxmayaraq, həyat eşqini itirirlər.

Alimlər iltihaba cavab verən neyronları bloklayaraq, dopamin ifrazını stimullaşdırıb və sitokinləri dərmanla neytrallaşdıraraq siçanlarda yenidən fəaliyyətə meyli bərpa edə biliblər.