Xərçəngə qarşı daha bir inqilabi addım | Süni intellektdən necə istifadə olunacaq?

Böyük Britaniyanın səhiyyə naziri süd vəzi xərçənginin daha erkən aşkarlanmasına kömək edəcək yeni bir sınaq layihəsinin başlandığını elan edib.

Yeni yanaşma hər il bu xəstəliklə diaqnoz qoyulan on minlərlə qadına kömək etmək potensialına malikdir.

Bu sınaqda ölkə üzrə 30 test mərkəzində 700 minə yaxın qadın iştirak edəcək. Süni intellekt texnologiyası radioloqlara mammoqrafiya müayinələri zamanı süd vəzi toxumasındakı dəyişiklikləri müəyyən etməyə kömək edəcək ki, bu da xərçəngin mümkün əlamətlərini daha erkən aşkar etməyə imkan yaradacaq.

Hazırda mammoqramlar üçün iki radioloqun təcrübəsi tələb olunur. Lakin Böyük Britaniya Səhiyyə Nazirliyi bildirib ki, yeni süni intellekt texnologiyası sayəsində yalnız bir mütəxəssis müayinə prosesini təhlükəsiz və effektiv şəkildə apara biləcək.

Əgər sınaq uğurlu alınarsa, radioloqlar və digər mütəxəssislərin daha çox test aparmasına şərait yaranacaq və bu da gözləmə siyahılarının azalmasına gətirib çıxaracaq.