Xəzər sahilində genişmiqyaslı çirklənmə: Neft qalıqları aşkarlandı - Baku TV

Xəzər rayonunun Zirə qəsəbəsi, Dübəndi yaşayış sahəsində dəniz sahilində neft qalıqları aşkarlanıb.

Bununla bağlı yayılan görüntülərdən sonra Fövqəladə Hallar Nazirliyi əraziyə Mülki müdafiə qoşunları və Xəzər Hövzə Qəza-Xilasetmə Xidmətinin şəxsi heyəti ilə texnikalarını cəlb edib.

Nazirliyin əməkdaşları tərəfindən sahildə genişmiqyaslı təmizlik işləri aparılıb. Buna baxmayaraq, ərazidə hələ də neft qalıqları və dəniz suyunun sahilə yaxın hissəsində qaralma müşahidə olunur. Sahildə kəskin neft qoxusunun hiss edildiyi, bəzi tullantıların da neftlə çirkləndiyi bildirilir.

Hazırda bölgədə güclü küləkli hava şəraiti hökm sürdüyündən sahilboyu ərazi demək olar ki, boşdur.

Hadisənin hansı səbəbdən baş verməsi ilə bağlı hələlik rəsmi açıqlama verilməyib. Ərazidə təmizlik işlərinin davam etdirildiyi, ekoloji vəziyyətin normallaşdırılması istiqamətində tədbirlərin görüldüyü qeyd olunur.