Yol polisindən magistralda tərsinə gedən avtobusla bağlı açıqlama

Rayonlararası sərnişindaşıma ilə məşğul olan avtobus yüksək sürətlə geriyə hərəkət edib. Bununla əlaqədar görüntülər sosial şəbəkələrdə yayılıb.

Bakı-Qazax yolunun Ələtdən keçən hissəsində qeydə alınan görüntülərdə “Daewoo” markalı, 99-LT-928 dövlət nömrə nişanlı sərnişin avtobusunun yan qapısı açıq formada, yüksək sürətlə geriyə doğru hərəkət etdiyi əks olunub.

Lakin avtobusun içərisində sərnişin olmadığı görünür. Şəbəkə istifadəçiləri videonun şərh hissəsində avtobusda nasazlıq yarandığına görə evakuatora qoşulduğunu qeyd ediblər.

Görüntülərlə əlaqədar Baş Dövlət Yol Polisi İdarəsindən bildirilib ki, sözügedən nəqliyyat vasitəsi heç bir təhlükəli vəziyyətə səbəb olmayıb:

“14.07.2023-cü il tarixində Bakı-Qazax-Gürcüstan avtomobil yolunda hərəkət edən “Daewoo” markalı, 99-LT-928 dövlət nömrə nişanlı sərnişin avtobusunda nasazlıq yaranıb. Bu səbəbdən nəqliyyat vasitəsinin evakuasiyası təmin edilib. Sosial şəbəkələrdə yayılan görüntülər isə avtobusun evakuasiya edilməsi zamanı qeydə alınıb”.