Zərərçəkən kişilərin sayına görə bu ərazi birinci yerdədir - Baku TV

2025-ci ildə Azərbaycanda məişət zorakılığı ilə bağlı cinayətlər nəticəsində 1 413 zərərçəkən qeydə alınıb.

Rəsmi məlumatlara əsasən, onların 1 176-sı qadın, 222-si isə kişidir. Ümumilikdə məişət zorakılığından zərər çəkənlərin təxminən 15,7 faizini kişilər təşkil edib.

Zərərçəkən kişilərin sayına görə ilk sırada Abşeron rayonu qərarlaşıb. İkinci və üçüncü yerlərdə isə Sabunçu və Xəzər rayonları yer alır. Belə ki, Abşeronda 13, Sabunçu və Xəzər rayonlarının hər birində isə 12 kişi məişət zorakılığının qurbanı olub.

Baku TV məsələ ilə bağlı paytaxt sakinlərinin fikirlərini öyrənib.

“Ailə düzgün qurulubsa, orada belə hallar ola bilməz. Əgər ailə qurarkən müəyyən səhvlərə yol verilirsə, belə hallar baş verir. Səbəb, yəqin ki, şəhərin inkişafı ilə də əlaqədardır. Kəndlərlə müqayisədə şəhərdə nisbətən daha çox müasirləşmə var. Bu baxımdan belə hallar baş verə bilər”, – sakinlərdən biri bildirib.

“Bir xəbərdə oxumuşdum ki, hansısa qadın öz həyat yoldaşını qətlə yetirib. Bir-birini başa düşməmək, sosial və maddi problemlər buna səbəb ola bilər”, – başqa bir sakin deyib.