35 kilometr hündürlükdə rekorda imza atıldı

"Project Hail Mary" filmi əsasında hazırlanan "LEGO" dəsti stratosferə göndərilərək "Ginnesin Rekordlar Kitabı"na düşüb.

"Ginnes"in açıqlamasına görə, dəst dəniz səviyyəsindən 34 988 metr hündürlüyə çataraq "LEGO" dəstinin ən yüksək hündürlüyə buraxılması və geri qaytarılması” rekordunu qırıb.

Uçuş Böyük Britaniyanın Qvinedd bölgəsindən həyata keçirilib. Layihə "Sony Pictures" və aerokosmik şirkət "Sent Into Space"in əməkdaşlığı çərçivəsində baş tutub. "LEGO" təxminən 35 kilometr yüksəkliyə qalxdıqdan sonra Yerə geri qayıdıb və tam şəkildə bərpa olunub.

Dəstin içərisində filmin əsas qəhrəmanı Rayland Qreys və yadplanetli "Rocky"nin minifiqurları da yer alıb. Rekordun rəsmi sertifikatı Las-Veqasda filmin yaradıcı heyətinə təqdim olunub.

Qeyd edək ki, Endi Veyrin bestseller romanı əsasında çəkilən “Project Hail Mary” filmi kosmosda tək qalan müəllim Rayland Qreysin Günəşin məhvinin qarşısını almaq üçün apardığı missiyanı və yadplanetli ilə qurduğu dostluğu təsvir edir.