ABŞ-nin bu addımı quldurluqdur? | Ekspertlər hər şeyi açıqladı

ABŞ Venesuela Prezidenti Nikolas Maduronun “Dassault Falcon 900EX” təyyarəsini Dominikan Respublikasında ələ keçirib və Floridaya gətirib.

Hava laynerinin saxlanılmasına səbəb ABŞ-nin ixrac nəzarəti və sanksiya qanunlarını pozması göstərilir.

Amerika tərəfi iddia edir ki, təyyarə qanunsuz olaraq 13 milyon dollara alınıb, N.Maduro və onun tərəfdaşlarının istifadəsi üçün Venesuelaya aparılıb.

Bu, ABŞ-nin təyyarə müsadirəsi ilə bağlı ilk belə hal deyil. ABŞ ötən ilin sonunda Argentinada İranın “Mahan Air” şirkətinə məxsus, lakin Venesuelanın “Conviasa” şirkətinin törəməsi olan “Emtrasur” üçün xidmət göstərən “Boeing 747-300” kargo təyyarəsini də ələ keçirib. Lakin hazırda söhbət ölkə prezidentindən gedir.

N.Maduro sahibkar və digər istiqamətdə fəaliyyət göstərən şəxs deyil ki, “təyyarə qanunsuz əldə olunub və bu həbs olunmalıdır” deyib, hərəkətin məhdudlaşdırılması əməliyyatı həyata keçirilsin.

Məsələ ilə bağlı iqtisadçı Elman Sadıqov bildirib ki, təyyarənin faktiki olaraq sahibi hər hansı bir 3-cü şirkətdir:

“Amerikanın da məntiqi bundan ibarətdir ki, siz, birincisi, bu təyyarəni alarkən qoyulmuş sanksiyaları pozaraq onu əldə etmisiniz. İkinci də təyyarə əldə olunarkən hər hansı bir şirkət tərəfindən izi itirmək üçün əldə olunub. Çünki o sanksiyalar çərçivəsində Venesuelanın Prezident Administrasiyası həmin təyyarəni, əslində ala bilməzdi.

Burada əsas məsələ bundan ibarətdir. Prezidentin istifadə etdiyi bir təyyarədir, amma Prezident Administrasiyasına, Venesuela dövlətinə də məxsus deyil”.

Məsələnin hüquqi tərəfinə gəldikdə isə dövlət və onun birinci şəxsi amili, suverenitet məsələsi önə çıxır. Yəni Prezidentin istifadə etdiyi təyyarənin digər ölkə tərəfindən 3-cü ölkənin ərazisindən götürülüb aparılması beynəlxalq hüquqa nə dərəcədə uyğundur?