ABŞ-nin "Rosneft" və "Lukoil"a qarşı sanksiyaları sülhyaratma məqsədi daşıyır

Ağ Evdə ABŞ Prezidenti Donald Tramp ilə NATO-nun baş katibi Mark Rutte arasında görüş keçirilib.

Görüş bir neçə məsələnin müzakirəsi ilə yadda qalıb.

ABŞ Prezidenti Donald Tramp rusiyalı həmkarı Vladimir Putinlə planlaşdırılan görüşün Vaşinqton tərəfindən ləğv edildiyini açıqlayıb:

“Prezident Putinlə görüşü ləğv etdik. Sadəcə, mən bunu düzgün hesab etmədim. Lazım olan nöqtəyə gəlməyəcəyimizi düşündüm, buna görə də ləğv etdim. Amma gələcəkdə razılaşıb görüşəcəyik”.

Bildirək ki, Rusiya-Ukrayna münaqişəsinin dialoq yolu ilə həlli dalana dirənib. İstanbul danışıqları və Trampla Putinin Alyaska görüşü sülh ümidlərinə nəfəs versə də, qordi düyününün açılması üfiqlər arxasında qalıb. Çünki gözlər Budapeştdə keçirilməsi razılaşdırılan Tramp-Putin görüşünə dikilmişdi. Bu isə ləğv olundu. Buna görə də Tramp sülhə məcburetmənin sanksiya metoduna əl atdı.

“Bilmirəm, bu sanksiyalar Putini danışıqlar masasına gətirəcəkmi, ya yox, amma onların mütləq təsiri olacaq. Bu sanksiyalar yanacaq sektoruna yönəlib. İki ən böyük neft şirkətinə qarşı, həm də dünyanın ən böyükləri arasında olanlara. “Rosneft” və “Lukoil” çox neft hasil edir. Ümid edirik ki, bu sanksiyalardan sonra Putin ağıllı qərar verər. Elə Zelenski də. Bilirsiniz, tanqo üçün iki nəfər lazımdır. İndiki halda isə Putin və Zelenski bir-birinə nifrət edir. Bu isə vəziyyəti çətinləşdirir”, ‒ deyə Ağ Ev lideri bildirib.

“Prezidentin bu gün sanksiyalarla etdikləri, əlbəttə ki, hər iki tərəfə, bu halda Rusiyaya daha çox təzyiq göstərmək deməkdir. Tramp bu yolla Putinə atəşkəs əldə etmək, mövcud cəbhə xəttində dayanmağı başa salmaq istəyir. Əlbəttə ki, bunun üçün təzyiq göstərmək lazımdır. Prezident Trampın bu gün etdikləri də məhz budur”, ‒ Mark Rutte vurğulayıb.

Qeyd edək ki, NATO da Avropanı Rusiyanın qara kölgəsinə çevirir. Köhnə qitənin şərqində Rusiyaya qarşı dron divarı salınır. Avropanın qərbi, Atlantik okeanında da Rusiyanın hərəkət arealı daraldılır. Örnək kimi, oktyabrın 23-də Rusiya sualtı qayığının Britaniyada saxlanılmasını göstərmək olar.