ABŞ yük gəmisinə hücum | Hərbi nümayəndə detalları açıqladı

23 yanvar 2024 518 baxış

Husilər Ədən körfəzində yük gəmisinə hücum edib.

Bu barədə Yəmən üsyançılarının hərbi nümayəndəsi Yəhya Sariya sosial şəbəkə hesabında məlumat verib. Gəminin ABŞ Hərbi Dəniz Qüvvələrinə məxsus olduğu deyilir.

Hərəkat nümayəndəsi bildirib ki, hücum ABŞ və Böyük Britaniyanın Yəmən ərazisinə etdiyi hücumlara cavabdır.

O həmçinin əlavə edib ki, husilər Fələstin xalqına qarşı təcavüz və Qəzza zolağının blokadası dayandırılana qədər İsrail gəmilərinin işğal olunmuş Fələstinin limanlarına daxil olmasının qarşısını almağa davam edəcək.

Məlumata görə, ABŞ bayrağı altında üzən ağır və irihəcmli yük gəmisi yanvarın 5-də İspaniyanın Kadis əyalətində yerləşən Rota hərbi dəniz bazasından çıxıb. ABŞ Silahlı Qüvvələrinin Mərkəzi Komandanlığının hesablamalarına görə, husilər keçən ilin noyabr ayının ortalarından bəri Qırmızı dənizdə 20-dən çox mülki gəmiyə hücum edib.

#ABŞ