Ağacların kəsilməsi sürətlə artıb

Qlobal iqlim böhranı şəraitində planetin "ağciyərləri" hesab olunan meşə örtüyü ciddi təhlükə altındadır. Baku TV-nin "Dünya" xəbər xidmətinin verdiyi məlumata görə, İsveç Meşə İdarəsinin yeni hesabatı Avropanın ən yaşıl ölkələrindən birində təbii meşələrin qırılma sürətinin rekord həddə çatdığını üzə çıxarıb. 2026-cı ilin mart ayına olan məlumatlara əsasən, İsveçdə hər gün təxminən 100 futbol meydançası böyüklüyündə qiymətli təbii meşə sahəsi məhv edilir. Əgər mövcud tendensiya bu templə davam edərsə, ölkədəki qorunmayan meşələrin cəmi 25 il ərzində tamamilə yox olacağı proqnozlaşdırılır.

Məlumata əsasən, 2022-ci ildə illik qırılma sahəsi 6 min hektar idisə, 2026-cı ilin əvvəlinə bu rəqəm artıq 26 min hektara yüksəlib. Videoda meşə sənayesinin iqtisadi maraqları ilə ekoloji tarazlıq arasındakı kəskin ziddiyyət, nadir bitki və heyvan növlərinin yaşayış yerlərinin məhv olması və biomüxtəlifliyin itirilməsi əks olunub. Reportajda qeyd edilir ki, sənaye müəssisələri kəsilən ağacların əvəzinə yenilərinin əkildiyini iddia etsələr də, ekspertlər süni əkilən meşələrin yüzillik təbii ekosistemləri əvəz edə bilməyəcəyini vurğulayırlar.