Ağlasığmaz üsullarla sui-qəsdə qurban gedən dünya liderləri

ABŞ-də prezidentliyə namizəd, sabiq prezident Donald Trampın sui-qəsdə məruz qalması siyasi liderlərə qarşı silahlı hücumları yenidən gündəmə gətirib. Tramp bu cür hücuma məruz qalan ilk lider deyil. Milyarder siyasətçinin bəxti gətirdi, yüngül yara alaraq bu hücumdan sağ qurtula bildi. Lakin sui-qəsdə məruz qalıb tale üzünə gülməyən, öldürülən kifayət qədər siyasətçi var.

1865-ci ilin aprelin 14 -də prezident Avraam Linkoln teatrda “Bizim amerikalı əmioğlumuz” tamaşasına baxarkən aktyor Con Uilks But tərəfindən qətlə yetirilib.

ABŞ-nin 35-ci prezidenti Con Kennedi 1963-cü il noyabrın 22-də Dallasda sui-qəsd nəticəsində həlak olub. Sui-qəsdin icraçısı kimi tutulan Li Harvi Osvald həbsdə olarkən Cek Rubi tərəfindən öldürülüb.

Hindistanın ilk və yeganə qadın Baş naziri İndira Qandi sui-qəsd nəticəsində öldürülən liderlər arasındadır. Qandi 1984-cü il oktyabrın 31-də sinqhlərə məxsus "Qızıl məbəd"ə hərbi basqın əmrini verdiyi üçün iki sinqh mühafizəçisi tərəfindən güllələnərək öldürülüb.

Nepal Kralı Birendra 2001-ci ildə qardaşı Şahzadə Dipendra tərəfindən qətlə yetirilib. Belə ki, iyunun 1-də axşam yeməyində spirtli içki qəbul edən şahzadə sərxoş vəziyyətdə ailəsini MP5 markalı avtomatla güllələyib. Birendranın həmin vaxt hadisə yerində olmayan kiçik qardaşı Qyanendradan başqa kral ailəsinin demək olar ki, bütün üzvləri öldürülüb. Faciəyə səbəb kimi kral ailəsinin Şahzadə Dipendranın 10 ildən çox görüşdüyü Devyani Rana adlı qadınla evlənməsinə qarşı olmaları göstərilir.

Pakistanın ilk qadın Baş naziri olan Benazir Bhutto 2007-ci ilin oktyabrında məruz qaldığı birinci sui-qəsd cəhdindən iki ay sonra – dekabrın 27-də Ravalpindi şəhərində terror aktının qurbanı olub.