Alimlər dinozavrlarla bağlı yeni fakt ortaya çıxardı | Araşdırmanın detalları

Bir qrup alim ideal şəkildə qorunan dinozavr qalıqlarının vulkanik mənşəli olması ilə bağlı məşhur fərziyyəni alt-üst ediblər.

Məlumdur ki, Yixian Formasiyasında dinozavrların, quşların, məməlilərin, həşəratların və digər canlıların yaxşı qorunmuş unikal qalıqları mövcuddur. Digər yerlərdə tapılan skelet və parçalanmış fosillərdən fərqli olaraq, burada bir çox heyvanın daxili orqanları, üzərindəki lələkləri, pulcuqları, xəzləri və hətta mədə tərkibi demək olar ki, olduğu kimi qorunub saxlanılıb.

Bu da hər hansı bir qeyri-adi konservasiya prosesinin baş verdiyini göstərirdi.

ABŞ, Çin və Afirkadan olan alimlər qrupu bu iddianın həqiqət olub-olmadığını müəyyən etmək üçün araşdırma aparıblar. Elm adamları tədqiqatlarda kimyəvi aşındırıcı spektrometriyadan istifadə ediblər. Qeyd olunan üsul ətraf süxurlardan götürülmüş sirkon dənələrində radioaktiv uran və qurğuşun nisbətini yüksək dəqiqliklə ölçməyə, eləcə də tapıntıların tarixini müəyyən etməyə imkan verib.

Məlum olub ki, Yerin orbitində baş verən dəyişikliklər səbəbindən rütubətli iqlim formalaşıb və yağıntının miqdarı artıb. Onların fikrincə, cəsədlərin parçalanmadan, anaerob şəraitdə sürətlə basdırılmasına məhz bu amil təsir edib.

Mütəxəssislər əldə olunan məlumatları emal etdikdən sonra vulkanik laharlar və piroklastik axınlar fərziyyəsini təkzib ediblər. Onların sözlərinə görə, bu cür proseslər baş verdikdə qalıqlar məhv ola bilər. Amma Yixian Formasiyasının fosilləri daha sağlam və səliqəli formada qorunub saxlanılıb.