Alimlərdən maraqlı araşdırma

Cəmi bir neçə dəqiqəlik yüksək intensivlikli məşq orqanizmdə uzunmüddətli, orta intensivlikli fiziki yüklə müqayisədə daha güclü bərpa reaksiyası yarada bilər.

Rokfeller Universiteti və Melburndakı tədqiqat mərkəzlərinin alimləri 19 sağlam gənc kişi üzərində araşdırma aparıblar. Könüllülər iki qrupa bölünüb: bir qrup maksimum güclə 30 saniyəlik velosiped sürüb, digər qrup isə bu hərəkəti 90 dəqiqə fasiləsiz yerinə yetyirib.

Qan analizləri göstərib ki, sürətli hərəkətdən sonra 2884 zülaldan 714-nün səviyyəsi dəyişib. Orta intensivlikli məşqdən sonra isə bu göstərici cəmi 7 zülal olub. İntensiv məşqdən sonra böyümə hormonu, yeni qan damarlarının yaranması və toxumaların bərpası ilə əlaqəli zülalların səviyyəsi yüksəlib.

Alimlər həmçinin müəyyən ediblər ki, yüksək sürətdən sonra əldə olunan qan plazması piy toxumasında 1677 genin aktivliyini dəyişib. Uzunmüddətli məşqdən sonra isə bu rəqəm 25 olub.

Bununla belə, tədqiqatçılar qısa və intensiv məşqin hər zaman daha faydalı olmadığını vurğulayırlar. Bildirirlər ki, orta intensivlikli məşq yağ turşuları da daxil olmaqla maddələr mübadiləsinə daha güclü təsir göstərir.

Tədqiqatçılar bu səbəbdən hər iki məşq növünün orqanizmin bərpasında fərqli və mühüm rolu olduğunu bildiriblər.