Arad və Dimonada partlayışlar | İran-İsrail gərginliyi pik həddə - Baku TV

İranın İsrailə hücumu nəticəsində Arad şəhərində ağır dağıntılar və itkilər qeydə alınıb.

Məlumata görə, zərbə zamanı 450 kiloqram partlayıcı maddə daşıyan döyüş başlığı partlayıb. Nəticədə, şəhərdə köhnə, 4 mərtəbəli 9 yaşayış binasının yerləşdiyi bütöv bir məhəllə dağılıb.

İsrail mediası bildirir ki, raketlər ultraortodoks yəhudilərin yaşadığı əraziyə düşüb. 1960–70-ci illərdə tikilmiş bu binalarda sığınacaqların olmaması itkilərin çox olmasına səbəb olub.

Hadisə nəticəsində ən azı 6 nəfərin öldüyü, 100-dən çox insanın yaralandığı bildirilir. Yaralılardan 60-dan çoxu “Soroka” tibb mərkəzinə çatdırılıb. Onlarla insanın hələ də dağıntılar altında qaldığı, bəziləri ilə əlaqənin olmadığı qeyd olunur.

İsrailin cənubunda yerləşən Dimona şəhərinə endirilən raket zərbəsi nəticəsində isə azı 42 nəfər xəsarət alıb.

Dimona ölkənin cənubunda, İsrailin Milli Nüvə Tədqiqatları Mərkəzinin yerləşdiyi Negev səhrasında salınıb.

Daha əvvəl İranın Dövlət Televiziyası bildirib ki, Dimonaya hücum Natanzdakı nüvə obyektinə endirilən zərbəyə cavab olaraq həyata keçirilib.