Avstriyada 10 min əsgərin taleyinə aid sənədlər tapıldı

Avstriyada bir tarixçi yerin altından tapdığı sənədlərlə İkinci Dünya müharibəsi dövrünə aid 10 min macar əsgərin xilas edilməsi barədə qədim əfsanəni təsdiqləyib.

Bu barədə "Need To Know" nəşri yazıb.

Belə ki, köhnə yeşiyi macar tarixçi İştvan Şebeni tapıb. O, yeşiyin yeri barədə daha əvvəl tapdığı bir məktub vasitəsilə xəbər tutub. Məktub onu keçmişdə qalanın yerləşdiyi Haq bölgəsinə aparıb. Basdırılmış yeşiyin içərisində əmrlər, operativ xülasələr və xəritələr olub.

Əfsanəyə görə, 1945-ci ildə həmin qalada yerləşən macar əsgərlər sovet qoşunlarının hücumunu gözləyirmiş. Onlar əsir götürüləcəklərinə əmin idilər və bu məqsədlə çıxış yolları axtarırdılar.

Problemi macar polkovnik Layoş Malanotti həll edib. O, köhnə dostu, ABŞ-li general Corc Pattona müraciət edib və sovet qoşunlarının əlinə düşməmələri üçün onun əsgərlərini əsir götürməsini xahiş edib. C.Patton isə bununla razılaşıb.

Son vaxtlara qədər bu rəvayətin etibarlı təsdiqi yox idi. İ.Şebeninin fikrincə, onun tapıntısı rəvayətin real hadisələrə əsaslandığını göstərib.