Banqladeşdə aləm bir-birinə dəydi | Ölənlərin sayı 300-ü keçdi
Banqladeşin Baş naziri Şeyx Hasina istefa versə də, ölkədə vəziyyət hələ də gərgindir, iğtişaşlar davam edir.
Bu səbəbdən Hindistanın sərhəd təhlükəsizlik qüvvələri Banqladeşlə sərhəddə həyəcan səviyyəsini artırıb. Paytaxt Dəkkədə yerləşən Beynəlxalq Hava Limanının istifadəsi isə insan axını səbəbindən müvəqqəti olaraq fəaliyyətini dayandırıb.
Həftələrdir davam edən etirazlar avqustun 4-ü “Ayrı-seçkiliyə qarşı Tələbə Hərəkatı” təşkilatının hakimiyyətlə əməkdaşlıqdan imtina etməsindən sonra daha da güclənib. Polislə əhali arasında baş verən toqquşmalar nəticəsində ölənlərin sayı 300 nəfəri ötüb. Yüzlərlə insan yaralanıb.
Etirazlara səbəb isə dövlət qurumlarında vəzifələrin 30%-nin Banqladeşin müstəqilliyi uğrunda 1971-ci ildə müharibədə iştirak edən veteranların qohumlarına verilməsinə dair qərar olub. Sonradan Banqladeş Ali Məhkəməsi qərarı ləğv edərək, kvotanı 7%-ə endirib.
Ölkəni tərk edən 76 yaşlı Şeyx Hasinaya gəlincə isə o, 2009-cu ildən bu vəzifədə olub. Onu da bildirək ki, Hasina hazırda müvəqqəti olaraq Hindistandadır. O, sığınacaq tələb etdiyi Böyük Britaniyaya köçürülməsini gözləyir. Hindistana getməsi isə insanlarda qıcıq yaradıb.
![icon](/images/loading.png)