Bayden BMT kürsüsündən son çıxışını edib | Sülh və ədalət naminə çalışın

ABŞ Prezidenti Co Bayden BMT Baş Assambleyasının 79-cu sessiyasında çıxış edib.

Bu onun BMT kürsüsündən vida nitqi və yəqin ki, beynəlxalq səhnədəki son çıxışlarından biri olub.

Qlobal çağırışlara toxunan C.Bayden birgə işləməyin vacibliyini vurğulayıb.

O, diplomatik səylərin davam etdirilməsinin lazım olduğunu bildirərək Qəzzadakı humanitar böhrana xüsusilə diqqət çəkib. C.Bayden Qətər və Misirə atəşkəs və girov razılaşması təklif etdiklərini, bu razılaşmanın BMT Təhlükəsizlik Şurası tərəfindən təsdiqləndiyini deyib.

O, İsrail və Fələstin arasındakı münaqişənin həlli üçün ikidövlətli həllin əhəmiyyətinə də toxunub və Yaxın Şərqdə sülh prosesinin davam etməli olduğunu vurğulayıb.

İranın nüvə məsələsinə də toxunan C.Bayden bu ölkənin nüvə silahı əldə etməsinə heç vaxt imkan verməyəcəyini bildirib. O həmçinin beynəlxalq ictimaiyyəti süni intellektin təhlükəsiz və məsuliyyətli istifadəsini təmin etmək üçün əməkdaşlığa dəvət edib.

C.Bayden dünya liderlərini və beynəlxalq ictimaiyyəti sülh və ədalət naminə birgə işləməyə çağıraraq onlara bəşəriyyətə xidmət etməyi heç vaxt unutmamalı olduqlarını xatırladıb.