Baydenin vəziyyətindən sui-istifadə etdilər? - Qalmaqal yaradan imza

05 iyun 2025 609 baxış

ABŞ Prezidenti Donald Tramp dövlət başçısı vəzifəsində sələfi Co Baydenin səhhəti ilə bağlı araşdırma aparılmasına göstəriş verib.

Ağ Evin yaydığı memoranduma istinadən xəbər verilir ki, Baydenin köməkçilərinin sənədləri imzalamaq üçün qələmdən istifadə etməsi məqamı da araşdırmaya cəlb olunacaq.

Sənəddə deyilir: "Prezident Bayden uzun illər ərzində ciddi idrak qabiliyyətinin itirilməsindən əziyyət çəkib".

Eyni zamanda memorandumda onun köməkçilərinin bu vəziyyətdən sui-istifadə edərək mühüm sənədləri imzalamaq üçün avtomatik qələmdən yararlana biləcəkləri qeyd edilir.

"Baydenin icraedici hərəkətlərinin böyük əksəriyyəti onun öz əlyazısı deyil, tez-tez avtopen adlanan mexaniki imza cihazından istifadə etməklə imzalanıb. Bu, xüsusilə onun prezidentliyinin ikinci yarısında, onda koqnitiv funksiyanın geriləməsi zamanı Baydenlə çox yaxın əlaqədə olan işçilər üçün daha aydın görünürdü", ‒ memorandumda belə deyilir.

#Donald Tramp