Belçikadakı meşə yanğını Almaniyaya doğru irəliləyir

Belçikanın şərqindəki Ut Fanye qoruğunda başlayan genişmiqyaslı yanğın Almaniya istiqamətində irəliləyir.

"Reuters" və "Associated Press" xəbər verir ki, Belçika tarixinin ən böyük meşə yanğını artıq 3 min hektardan çox ərazini məhv edib.

Qeyd edilib ki, ölkədə havanın temperaturu 37 dərəcəyə qədər yüksəlib. Qoruğun ərazisi süpürgəotu və torf bataqlıqlarından ibarətdir ki, bu da yanğının söndürülməsini çətinləşdirir.

Yerli hakimiyyət orqanlarının məlumatına görə, Almaniya sərhədi yaxınlığındakı Lyej əyalətində təxminən 600 nəfər təxliyə edilib. Turistlərə və sərhədyanı rayonların sakinlərinə regionu tərk etmək tövsiyə olunub. Zərərçəkənlər və ya ölənlər barədə məlumat verilmir.

Almaniyanın Monşau şəhərinin hakimiyyət orqanları xəbərdarlıq edir ki, alov artıq ölkə sərhədindən 3 kilometr aralıdadır. Yanğının söndürülməsinə 250-dən çox canlı qüvvə, Belçika və Almaniyadan 100-dən çox yanğınsöndürən, polislər və xilasedicilər cəlb olunub.

Avropa İttifaqı Brüsselin təcili əlavə qüvvə xahişinə cavab olaraq üç helikopter və iki amfibiya təyyarəsi göndərib.