Bir neçə dəqiqədə elə şeylər oldu ki... | Dəhşətli təhlükə barədə xəbərdarlıq

Santorini adası boşdur, lakin seysmoloji fəaliyyət davam edir. Təhlükə səbəbindən turistlər və yerli sakinlər adanı tərk edirlər. Burada silsilə zəlzələlər davam etdiyi üçün insanlar Afinaya çatmaq ümidi ilə qaçırlar.

Egey dənizindəki Santorini və Amorqos vulkanik adaları arasındakı dənizdə bir neçə dəqiqədən bir yüzlərlə zəlzələ qeydə alınıb. Yeraltı təkanlardan birinin gücü 4,7 bal olub. Bu səbəbdən təkcə Santorinidə deyil, yaxınlıqdakı adalarda da məktəblər bağlanıb.

Seysmoloqlar hesab edirlər ki, intensiv seysmik aktivlik günlər və ya həftələr ərzində azala bilər. Həmin vaxta qədər insanlara sürüşmə riski səbəbindən sahilyanı ərazilərdən uzaq durmaq və qapalı yerlərdə toplaşmaqdan çəkinmək tövsiyə edilib.

Bəzi hotellər binalarını daha davamlı etmək üçün hovuzlardan suyu boşaltmağa başlayıblar. Yunanıstan, Afrika və Avrasiya tektonik plitələrinin sərhədində yerləşdiyi üçün Avropanın zəlzələyə ən çox meyilli ölkələrindən biridir.

Daha əvvəl xəbər verildiyi kimi, yanvarın sonunda Santorinidə vulkanik aktivliyin artması qeydə alınıb. Xatırladaq ki, sonuncu əhəmiyyətli püskürmə 1950-ci ildə baş verib. Hazırda alimlər vulkanın yenidən püskürəcəyinə dair heç bir əlamət görmürlər.